مرحبا ? نقلا عن راما الكسراوي
بما انو بسبب هالغروب العظيم طلعنا على جزر الكناري فحابة احكي هون شوية ملاحظات وتفاصيل عن السفر لجزر الكناري وبالأخص لحزيرة لانزاروت اللي هيي جزيرة بركانية فما تتخيلوا انكم رايحين عالمالديف ههههه مافيها خضار الا صبار واشجار نخيل بس كتير حلوة ?
حجزنا على خطوط ال Rayanair من فرانكفورت ل لانزاروت روحة رجعة ب 75 يورو…. مدة الرحلة تقريبا 4 ساعات… عملنا فحص كورونا سريع وعبينا الاستمارة تبع وزارة الصحة الاسبانية… كتير مهم انو اللي بدو يسافر مع هالشركة حاليا بدو حصرا جواز سفر ساري الصلاحية… عالاوزفايز لحالها ما قبلو ولا حتى عالجواز الاخضر…
نحن استأجرنا سيارة عالنت مع شركة plus car وكانت الاجراءات كتير سهلة وميسرة… السيارة ل 7 ايام ب 140 يورو… بتاخد السيارة من المطار وبترجعها محل ما اخدتها وبتمشي فيها قدما بدك وما اخدوا مننا لا تأمين ولا شي….
حجزنا شاليه من تطبيق Airbnb عالبحر مباشرة ل 4 اشخاص ب 600 يورو لمدة 7 ايام… الشاليه مرتب ونضيف واطلالتو بتجننننن ?…
بالجزيرة اسعار الاغراض بالمول ارخص من المانيا والبنزين ارخص بكتير من المانيا… عبينا السيارة ب 40 يورو بانزين كفتنا كل الاسبوع مع ان سافرنا فيها كتير… ليتر البنزين ب 1.06 يورو
الاماكن السياحية كتير مميزة واسعارها ما غالية ابدا بصراحة ومقارنة بغير دول…. فينك تشتري كرت واحد لاكتر من مكان وهيك بيرجع السعر كمان ارخص… الكرت بتشتريه من عباب اي مكان سياحي… في منهم ببلاش… اهم الاماكن الحلوة هنيك
اولا Timanfaya Nationalpark الدخولية ب 12 يورو بيتضمن جولة بالباص بين البراكين لمدة 35 دقيقة وبتشوفو الشوي عالبركان وشوية نشاطات متل بيحطو مي جوا فتحات بالبركان فبتطلع متل انفجار هنيك في مطعم بتقدروا تطلبوا الشوي عالبركان او هيك شي…
تاني مكان Jameos del Agua عبارة عن مغارة وواحة كتير حلوة الدخولية عالاغلب ب 8 يورو
تالت مكان Cueva de los Verdes عبارة عن جولة مع مرشد سياحي تحت البركان مدتها تقريبا 40 دقيقة بتكلف 10 يورو
نحن اخدنا كرت للاماكن التلاتة ب 23.5 يورو وماندمنا ابدا بصراحة…
في أماكن تانية حلوة ودخوليتها مجانية متل El golfo و Papagayo strände وكتير اماكن غيرهم…
اذا بتحبو يوم الاحد بمدينة Teguise بيكون في متل بازارا ماركت من الساعة 9 للساعة 14
واذا مريتو على El golfo لازم تدوقو السمك عند مطعم El Pescador لان عندو اكلنا اطيب سمك دقناه بحياتنا كلها
للرجعة عملنا فحص سريع بعيادة عالجزيرة وكلف 30 يورو وهاد ارخص الموجود… اذا حدا طلب منكم اكتر لا تقبلوا ودوروا على مكان تاني ?
بالجزيرة كلشي فاتح ومافي حجر والمطاعم فاتحة لنص الليل وما بيحتاج الواحد لا فحص كورونا ولا اي شي تاني?
وهي شوية صور للجزيرة وخريطة للجزيرة والأماكن السياحية..
